epub
 
падключыць
слоўнікі

Янка Купала

Да моладасці

Ты скажы, скажы,

Мая моладасць,

Што дала ты мне,

Сыну хамскаму?

 

Ой, дала ты мне

Скарб нязмераны:

Сілу моцную,

Неўгамонную.

 

За труды мяне

Не адхваляцца,

З мазалёў, крыві

Не аддзівяцца.

 

Дзе мой капне пот,—

Дзірван, пасека

Шуміць коласам,

Урадлівасцю.

 

Сенажаць-трава

Ляжа покатам,

Стогне зелен бор

Пад рукой маёй.

 

Дый услужнасцю

І пакорнасцю

Надарыла ты

Мяне, моладасць.

 

Адно, доля дзе,

Скажы, моладасць?

Чаму волю даць

Ты забылася?

 

[1908]


[1908]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан