Ёсць старонкі, дзе ў народзе
Беды не гуляюць:
Хлеба годзе, святла годзе,
З волі карыстаюць.
А у нас жа, што за дзіва?
Бяздольнасць такая!..
Дрэмле Юрка ў заканурку
І долі чакае!
*
Пахілілася хаціна,
У хлявочку пуста;
Толькі латы — кажурына,
Хлеба — хоць бы луста.
Кепска жыці, што ж такое,
Хто аб гэтым дбае?..
Дрэмле Юрка ў заканурку
І долі чакае!
*
Чутны воклік пахаронны,
Крыж стаўляюць новы;
Дзень і ноч у кузнях-горнах
Ладзяць, клеплюць ковы;
Беспрасветна, беспуцінна,
Як магіла тая!..
Дрэмле Юрка ў заканурку
І долі чакае!
*
Дабрадзеяў, як на тое,
Хоць прудзі ты рэкі!
Слаўна, Юрка! Што ж такое?
Мае шмат апекі.
Хоць яму апека гэта
Косткаю у горле...
Дрэмле Юрка ў заканурку
І чакае долі!
[1920]