epub
 
Падключыць
слоўнікі

Янка Купала

Два светы

1 Дзед
2 Унук


1 Дзед

Сёрбай, дзеду, сёрбай

Крупнік ды зацірку,—

Пабрыдзеш бо з торбай,

З торбай дзірка ў дзірку.

 

Закарбуй на бірку,

Што на гора спор быў,

Спорна год нацыркаў,

Дарабіўся горбу.

 

Высвідраваў корбай,

Вырыў плугам-кіркай

Баразністу ворбу

Тры аршыны шыркай.

 

Выцерпеў прыдзіркаў,

Што і мор не сцёр бы,—

Стар і мал век гыркаў:

— Сёрбай, дзеду, сёрбай!

 

2 Унук

Дзедаў ўнук-гарэза,—

Як чмель чапурыцца,

Ўсе б платы парэзаў,

Плот яму — макрыца.

 

Ён не спакарыцца,

Як сам рымскі цэзар,—

Хто супроць — кастрыцай,

Бахне і з «абрэза».

 

У руках жалеза

Жарам заіскрыцца,

Не ўпляце дзярмезаў

Яму і цямрыца.

 

Як ёсць чым прыкрыцца —

Багацей ад Крэза...

Выйдзе ў свет крыніцай

Дзедаў ўнук-гарэза.

 

1926


1926

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан

Беларуская Палічка: http://knihi.com