Дзе стаяў двор панскі
Грознаю пікетай
І паны спраўлялі
Гарцы ды банкеты,—
Там цяпер красуюць
Выселкі, пасёлкі,
А іх аздабляюць
Сяміцвет вясёлкі.
*
Дзе стаяў на полі
З бічам прыганяты
І ганяў прынукай
Змучаных аратых,—
Там цяпер без страху
З выглядам малойца
Новы, вольны сейбіт
Братаецца з сонцам.
*
Дзе палац быў панскі,
Дзе жыццё йшло пуста
І гняздо звівалі
Вызыск і распуста,—
Там цяпер парадак
Іншы разгарнуўся:
Сочаць веды дзеткі —
Кветкі Беларусі.
1926