epub
 
Падключыць
слоўнікі

Янка Купала

Дзве дзяўчыны

Па узгорках, па далінах,

Ветрам-віхрам несупынна

Мчыцца быстрая машына,

А ў машыне дзве дзяўчыны,

Дзве дзяўчыны, як маліны...

 

Сцеражыся, супраціўнік!

Адбівае дні гадзіннік.

 

Шофер з іх адна бывалы —

Ёй не страшны віры, скалы,

Долы, горы, перавалы,

Дае ход машыне ўдалай,

А ўсё далей хваляй, валам...

 

Сцеражыся, супраціўнік!

Адбівае дні гадзіннік.

 

Інжынер — тая другая,

Будаваць машыны знае,

Аб ёй слава па ўсім краі:

Што такая маладая,

А машыны выдумляе!..

 

Сцеражыся, супраціўнік!

Адбівае дні гадзіннік.

 

У расквечаным прасторы

Дзве дзяўчыны-непакоры

Едуць полем, едуць борам,

Перад імі сушы, моры,

А над імі сонца, зоры.

 

Сцеражыся, супраціўнік!

Адбівае дні гадзіннік.

 

1935


1935

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан

Беларуская Палічка: http://knihi.com