Ён і работнік грамадзянскі,
Мужыцкі пан і служка панскі,
І антыквар, і археолаг,
І бібліёлаг, і філолаг,
І быў бы слаўным ён зусім,
Каб быў чым-колечы адным.
*
То беларус, то палячок,
А чым папраўдзе — не згадаць.
Паслухай, гладкі панічок:
Пашто так скурай гандляваць?
*
У кавярні водзіць рэй і лад,
Бывач яе заўсёдны, шчыры,
Сатыры піша там на ўсіх,
А сам — смяшнейшы ад сатыры.
*
Варшаўскіх брукаў марны франт,
Пусты на словах, хлюст, педант,
На дзеле — невук, дылетант,
А як паэта — ў прэйскурант
Гадзішся толькі, мой ты франт.
1913