epub
 
Падключыць
слоўнікі

Янка Купала

Генацвале

Снег бялеецца ў вышынях,

На гары, на стромкай скале,

Кветкі квецяцца ў даліне,—

Ў сонцы, ў кветках Генацвале.

 

Было люба мне ў Цхалтуба,

Ў жыватворнай цёплай цхалі,

Было люба, як галубіў

Цябе ў думках, Генацвале.

 

Ты лячыла ўсмешкай мілай,

Твае лекі чаравалі,

Сны чароўныя будзіла

Ты, грузінка, Генацвале.

 

Ой, паеду я далёка,

Сэрца сціснецца ад жалю,

Будзе сумна, адзінока

Без цябе мне, Генацвале.

 

Будуць сніцца скалы, горы,

Грузіі цудоўнай далі,

І адна ты з ясных зораў

Сніцца будзеш, Генацвале.

 

Эліко, маё світанне,

Смутна зоркі мне міргалі...

«Суліко» на адвітанне

Праспявай мне, Генацвале!

 

1938


1938

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан

Беларуская Палічка: http://knihi.com