epub
 
Падключыць
слоўнікі

Янка Купала

Ігнату Буйніцкаму

Важна рэй Ігнат Буйніцкі

Ў танцах нашых водзіць,

Аж здаецца — усё чыста

Хадыром з ім ходзіць.

 

Калі пусціцца скакаці,—

Ажна сэрца скача;

Лепшых танцаў і ўвесь Піцер

Бадай што не бачыў.

 

Ці «Мяцеліца», ці «Юрка»,

«Мельнік», ці «Антошка»,—

Усё ў яго сыходзіць гладка,

Не змыліць ні трошка.

 

Пад дуду і пад цымбалы

Топне, прыспявае...

Сцеражыцеся, ўсе людзі:

Беларус гуляе!

 

Не ўнімайся ж і скачы нам,

Покі сілы хваціць,

Мо пачнуць і думкі нашы

Весялей скакаці!

 

[1911]




Беларуская Палічка: http://knihi.com