* * *
Я нясу вам дар
Братніх скіб і сяліб,
Смутных сосен і ліп,
Думак дар, сэрца жар,—
Вольных, звонкіх песень чар.
Гэй! нясу вам дар!
Гэй! гэй! гэй!
Хай жа песня ўсюды льецца,
Ў сэрцах вашых адгукнецца,
Ззіханецца, ўскалыхнецца,
Як звон той,
Як свой!
А хто брат мне тут і друг,
Ладзь-наладзь душу і слух
І за песняй думкай скоч
Там, дзе Нёман, Дзвіна, Буг
Точаць наша поле, луг,
Дзе шумяць у свет далёкі
Белавежа, Налібокі
Дзень і ноч,
Думкай скоч!
Прымі дар, сэрца жар,
Вольных, родных песень чар!
Гаю, гаю, гэй!
[1906-1910]