epub
 
Падключыць
слоўнікі

Янка Купала

Еду сягоння я ў Вільню...

Мінск, Маладзечна, Вільня...

Як жа знаёмы шлях гэты!

Змерыў яго я калісьці,

Як шукаў шчасця па светах.

 

Колькі ж ні ехаў тады я,

Ці то ў мароз, ці ў разводдзе,

Царскі жандар мяне тупа

І спатыкаў, і праводзіў.

 

Ехаць прыйшлося нядаўна,

Год таму тры ці чатыры,—

Тыя ж убогія хаты,

Тыя ж ля хат камандзіры.

 

Бачыў, як тамка пасліся

Свінні ў чужым агародзе.

Польскі жандар мяне тупа

І спатыкаў, і праводзіў.

 

*

Еду сягоння я ў Вільню

Следам за арміяй нашай,—

Царскім і польскім жандарам

Думак дарога не страша.

 

Сум недзе згінуў кашмарны,

Жудасць па хатах не бродзіць,

Кветкамі дзеці й дзяўчаты

Нас спатыкаюць, праводзяць.

 

1939


1939

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан

Беларуская Палічка: http://knihi.com