epub
 
Падключыць
слоўнікі

Янка Купала

"Калі ў свет я ні гляну прыгожы..."

* * *

Калі ў свет я ні гляну прыгожы,

Кожны раз штось хвалюе душу,

Чуласць дзіўная грудзі трывожа,

Не любіў бы — любіці спяшу.

 

І людзей, што ў трудзе, бы мурашкі,

Плечы гнуць, як братоў бы туліў,

У нядолі, у працы іх цяжкай

Пацяшаў, песні пеў, весяліў.

 

Але толькі ці ж хопіць мне сілы

Перажыць, не ахутацца ў цьму,—

Калі замест грудзей братніх, мілых

Я да сэрца гадзюку прыжму?!

 

16 чэрвеня 1907


16.06.1907

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com