epub
 
Падключыць
слоўнікі

Янка Купала

На дудцы

Як жа можна ў маёй хаце

Жыць долі,

Калі хлеба ёй не хваце

І солі?

 

З маёй хаткі пацех мала,

Як з лому;

З страхі бура паздзірала

Салому.

 

На падпорах сцены, шулле

Гнілыя;

Вецер чуць не перакуле,

Як вые.

 

А праз нізкія аконцы,

Як ночай,

Хоць бы глянуць ясна сонца

Не хоча.

 

Вясна з голадам прыходзе

Заўсёды,

І благія шле разводдзе

Прыгоды.

 

Летам — праца, пот сплывае

Ракою.

Што засею — град збівае

Без бою.

 

Прыйдзе восень, золка стане

Час цяжкі;

Па пустым таку б’е зрання

Цэп важкі.

 

А зімой завеі ў полі

Гуляюць,

Хаўтуры па маёй долі

Спраўляюць.

 

[1906-1910]




Беларуская Палічка: http://knihi.com