epub
 
падключыць
слоўнікі

Янка Купала

На сход!

На сход, на ўсенародны, грозны, бурны сход

Ідзі, аграблены, закованы народ!

 

Як роўны йдзі жыхар між роўных жыхароў,

Аддай на суд свае ўсе крыўды, слёзы, кроў.

 

Аб вечным катаванні, здзеку далажы

І пакажы на курганы і на крыжы.

 

І аб раскопаных магілах не забудзь,

Дзе груганы тваіх там продкаў косці рвуць.

 

Як гналі пот з цябе паны і каралі,

Як гналі проч цары з радзімае зямлі.

 

І як крываўляць раскаваныя рабы,

Як ты ўпадаеш з непасільнай барацьбы.

 

Як Бацькаўшчыну тваю рэжуць на кускі.

Як гібнеш з дзецьмі ты ад катняе рукі —

 

Аддаці ўсё на суд, на ўсенародны сход

Ідзі, аграблены, закованы народ!

 

1918


1918

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан