epub
 
падключыць
слоўнікі

Янка Купала

На службе

Эх, праклятая доля мая,

Ненавісная служба — прыгон!

Смокча кроў з мяне пан, як змяя,

Ды йшчэ грозіць, што выганіць вон.

 

За ліхую заплату з душой

Маю радасць, быдлё, абакраў,

І, ў палон мяне звабіўшы свой,

Крыві мала — жыццё б адабраў.

 

Ці нядзелька, ці свята мне ёсць,

Ці як людзі гуляў я калі,

Ці ў мяне пагасціў добры госць,

Ці мне добрае слоўца далі?

 

А не з дзерава сэрца маё,

Не вада ў маіх жылах плыве,

Мае вочы і твар не трухлё,

Замест дум не смяццё ў галаве.

 

Як і людзі, хацеў бы я так

Пагуляць, на бяседзе пабыць,

Паспяваць аб жыцці небарак

І з дзяўчынай-красой падружыць.

 

Ды праклятая доля мая,

Ненавісная служба — прыгон!

Смокча кроў з мяне пан, як змяя,

Ды йшчэ грозіць, што выганіць вон.

 

1906


1906

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан