epub
 
падключыць
слоўнікі

Янка Купала

Навука

Знаем мы навуку,

Знаем не адну:

Дзедаў дзед праўнуку

Перадаў свайму...

 

Ўстаці рана-рана,

Позна легчы спаць,

Працаваць дап’яна,

Ў поце працаваць.

 

Што было учора,

Мець ва ўсім гаду,

Сеяць зерне-гора,

Жаць жніво-бяду.

 

Абіваць парогі

Сыценькім людзям,

Кланяцца у ногі

Злыдням і трутням.

 

Беспрыпыннай зданню

Мераці зямлю,

Віць па прыказанню

Сам сабе пятлю.

 

Ў брэдняў верыць кучы,

Ў што не вера той,

Хто нас гэтак вуча

Летам і зімой.

 

Ў родным краю, ў хаце

Быці чужаком,

Праўданькі шукаці

Ў брата кулаком.

 

І душу, і сэрца

Весяліць карчмой,

А як ліха ўпрэцца,

Падружыць з турмой.

 

З боскага суджэння

Без пары сканаць,

За ўсе тут мучэнні

Ў пекле мук чакаць.

 

Гэткую навуку

Знаем не адну,

Дзедаў дзед праўнуку

Перадаў свайму.

 

1913


1913

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан