epub
 
Падключыць
слоўнікі

Янка Купала

Не дружы...

Не дружы з панамі,

Бедзен мужычок.

На дружбу з багатым

Вузак твой шнурок.

 

У палацы белым

Табе не гуляць,—

Там народ вясёлы,

Песенькі звіняць.

 

Там віно ліецца

Пеністай ракой,

Ад яды сталы там

Гнуцца дарагой.

 

Сядзяць за сталамі

Паны ў грамадзе,—

Сытыя ўсе твары.

Тваё ж месца дзе?

 

Стаіш у парозе

З шапкаю ў руках,

Прытухлыя вочы

Водзіш па панах.

 

Пазнаеш, гаротны,

Што ты не такі,

Не тваё тут месца,

Не твае дружкі.

 

1907


1907

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com