Не дружы з панамі,
Бедзен мужычок.
На дружбу з багатым
Вузак твой шнурок.
У палацы белым
Табе не гуляць,—
Там народ вясёлы,
Песенькі звіняць.
Там віно ліецца
Пеністай ракой,
Ад яды сталы там
Гнуцца дарагой.
Сядзяць за сталамі
Паны ў грамадзе,—
Сытыя ўсе твары.
Тваё ж месца дзе?
Стаіш у парозе
З шапкаю ў руках,
Прытухлыя вочы
Водзіш па панах.
Пазнаеш, гаротны,
Што ты не такі,
Не тваё тут месца,
Не твае дружкі.
1907