epub
 
Падключыць
слоўнікі

Янка Купала

Не спадзейся...

Не спадзейся, сын і матка,

Ад жыцця патолі...

Ні канца, ані пачатку

Вашай чорнай долі.

 

Ці сягоння, ці то заўтра —

Як і ўчора, усё так;

Стогн гняздзіціся спанатрыў,

Жаль пляце свой мотак.

 

Шчасце ў путах... Звод развеяў

Думку маладую,

Засталось крыху надзеі,

Дый паганяць тую.

 

Вера ў будучыны жніва

Спапялела з гора,

Крыўда-ведзьма незмянліва

Заліла, як мора.

 

Гарт апёрся на кургане,

Як ноч, уздыхае,

І ў кургане уздыханне

Гарту падцінае.

 

Каня з смагі на пагодзе

«Піць» галосе ў небе,

Ды ў завею воўк заводзе

Па крывавым хлебе.

1910




Беларуская Палічка: http://knihi.com