epub
 
Падключыць
слоўнікі

Янка Купала

Ой, павей, вецер!..

Толькі йшчэ ўчора, не далей,

Сярод малітваў, кляцьбы

Гэткія песні складалі,

Песні нуды і журбы:

 

Ой, павей, вецер, з Усходу,

Вестачку нам прынясі,

Як там жывецца народу,

Хто колькі зжаў, накасіў.

 

Ой, павей, вецер-саколік,

Хай там пачуюць яны,

Як мы цярпім у няволі,

Як нас катуюць паны.

 

Ой, павей, вецер, нам, мілы,

Голас ім твой хай спяе,

Як мы без часу ў магілы

Косці складаем свае.

 

Ой, павей, вецер, над гаем,

Хай прыйдуць ночкай ці днём,

Кветкамі іх прывітаем,

З ружы вянкі ім спляцём.

 

1939


1939

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан

Беларуская Палічка: http://knihi.com