epub
 
падключыць
слоўнікі

Янка Купала

Памаліся

Памаліся, старча,

За дабро, за збожжа,

Што сяўцоў сабою

Пракарміць не можа.

 

Памаліся, старча,

За жывёлку-статак,

Што ідзе, рыкае

Каля дымных хатак.

 

Памаліся, старча,

За людзей, за нелюдзь,

Што ляглі, заснулі,

Што жывуць і дрэмлюць.

 

Памаліся, старча,

І за край свой родны,

Што гадкі кароце

Ў сіверах нязводных.

...........................

Памаліся, старча!

 

1909


1909

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан