epub
 
Падключыць
слоўнікі

Янка Купала

Памяці Эдуарда Самуйлёнка

Дружа мой, сокале ясны, крылаты,

Крыллі навекі апалі твае,—

Ты ўжо не прыйдзеш на нашыя святы,

Голас твой песень для нас не спяе.

 

Слёзамі дожджык пальецца на грудзі,

Насып-магілку абсыпе расой,—

Слёзы высушываць сонейка будзе,

Сонейка будзе заўсёды з табой.

 

Восенню кветкі завянуць у полі,

Кветцы засохшай ізноў не цвісці,—

Думкі твае не завянуць ніколі,

Думкі аб нашым прыгожым жыцці.

 

1939


1939

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан

Беларуская Палічка: http://knihi.com