epub
 
Падключыць
слоўнікі

Янка Купала

Перад вясной

Рушыўся снег, зашумела вада,

Раскаваліся рэкі ад лёду,

Хлынула вон зімавая нуда,

Сонца ўносе цяпло і пагоду;

Шумныя песні іграюць лясы,

Павявае вятрок цеплаваты,

Белая ніва ад снежнай расы

Ўбіраецца ў чорныя латы.

Трушанкай зморана ў цёмных хлявах,

Адзываецца рыкам скацінка;

Конікі ў стайнях іржуць пры жлабах;

Бацян праляцеў над адрынкай.

Будзіцца после зімовага сну

Па хацінках людок працавіты,

Скорынька цягне саху, барану,

Глядзіць, ці шыны на колах узбіты.

Высыпе гэты на поле народ

І сеяць будзе свянцонае збожжа...

Добры ўраджай, спорны ўмалот

Працавітым людзям пашлі, Божа!

 

[1905-1907]


[1905-1907]

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com