epub
 
падключыць
слоўнікі

Янка Купала

Песня

Бяжыць шыбка ручаінка

Па жвіровым дне;

Жыве ў вёсачцы дзяўчынка,

Ўпадобная мне.

 

Ў ручаінцы днём і ночай

Вадзіца бурліць;

У дзяўчынкі гараць вочы,

Кроў кіпіць, кіпіць.

 

Эй! так хочацца вадзіцу

З той крынічкі браць;

Дзяўчыначку белаліцу

Туліць, цалаваць.

 

На млын грэбляй ручаінку

Здзержу, перайму;

Ненаглядачку-дзяўчынку

За жонку вазьму.

 

Млынок будзе малоць збожжа

Для добрых людзей;

Плакаць жоначка паможа

Ў хатачцы маей.

 

[1906-1910]


[1906-1910]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан