epub
 
падключыць
слоўнікі

Янка Купала

Плача восень

Плача восень за акном,

Слёзы плюскаюць аб шыбы,

Абняла трывожным сном

Непрытульныя сялібы.

 

Плача восень, стогне ў сне,

З пушчай, з ветрамі галосіць,

Як бы дзе каго кляне

Ці аб шчасці моліць, просіць.

 

Плача восень ноч і дзень,

Слёзы плюскаюць аб вокны,

А па хаце чорны цень

Лазіць, тчэ свае валокны.

 

Гэта ходзіць, бродзіць сум,

Душу мучыць ў сваіх сетках

І трывожыць сказы дум,

Дум аб шчасці і аб кветках.

 

1915


1915

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан