epub
 
Падключыць
слоўнікі

Янка Купала

Прад світаннем

Ціха... Бачце: штось варушыцца,

Штось паўстаці хоча;

Перажытасць гнецца, крушыцца,

Новы свет шапоча.

 

Сонца з цемрамі змагаецца;

Мох злятае з хат і пунь;

Даль за даляй ажыўляецца;

Ўсходзе ядраная рунь.

 

Дрыгацяць напасці-пошасці,

Аціхаюць совы,

Разнімаюцца з паношасцей

Крыллі гругановы.

 

На курганішчы спускаюцца

Туманы жывой расой

І па пустках расплываюцца

Бесканечнай паласой.

 

Доляй-мачыхай прыдаўленых

Зоры аклікаюць,

Ля магілішч акрываўленых

Валахі чакаюць.

1909




Беларуская Палічка: http://knihi.com