epub
 
падключыць
слоўнікі

Янка Купала

Праступнік

Судзіце мяне ў ссылку,

Закуйце ў ланцугі,—

Праступнік я вялікі,

Папоўніў я грахі.

 

На хату сухастойку

У панскай пушчы ссек,

На дзірванок на дворны

Я ездзіў на начлег.

 

У воласць не аддаў я

Падаткаў у пару,

Схадзіць раз на абедню

Я не паспеў ў царкву.

 

Раз перад земскім шапкі,

Здурэў, забыўся зняць,

Урадніку, падпіўшы,

Хацеў касцей намяць.

 

Чытаць люблю я кніжкі,

Газетку раз знайшлі,

Крычаў з другімі з гора:

Свабоды і зямлі!

 

Я грэшнік, я праступнік,

Мой Божа дарагі!

Судзіце мяне ў ссылку,

Закуйце ў ланцугі!

 

1907


1907

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан