epub
 
Падключыць
слоўнікі

Янка Купала

Рвіся, думка!..

Покі старасць неўдалая

Костак з ног не вале,

Рвіся, думка маладая,

Туды, вышай, далей!

 

К таей праўдзе ненапраснай,

К шчасцю і свабодзе;

Рвіся, покі будзе ясна,

Покі будзе годзе!

 

Гарапашна, непрасветна

І ў душы, і ў хаце,

Стане горай непрыветна,

Калі будзем спаці.

 

Дык жывуча, скокам-бокам,

Покі сэрца точыш,

Рвіся, думка, ненарокам,—

Знойдзеш, чаго хочаш!

 

Рвіся! рвіся! дый старайся

Нуду адалеці,

Заглушыцца не давайся

Ні за што на свеце.

 

[1906-1912]


[1906-1912]

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан

Беларуская Палічка: http://knihi.com