epub
 
Падключыць
слоўнікі

Янка Купала

Рвуцца сілы...

Сняцца слёзы, сэрца ные,

Пяюць ветры дзіка;

Рвуцца сілы маладыя

Да працы вялікай.

 

Рвуцца, як той сокал з клеткі,

Людзьмі закаваны,

Рвуцца, хоць лёс чорны гэткі

На душы тнець раны.

 

Рвуцца к бітвам з непагодай,

З няволяй, з нядоляй,

Туды рвуцца, дзе заўсёды

Слёз і гора болей.

 

Без упыння рвуцца сілы,

А вецер шумлівы,

Як падземны, як з магілы,

Вые ўсім надзіва:

 

«Эх, дарэмна гэтак рвешся

З маладой душою!

Аб няпраўду разаб’ешся

З сваёй барацьбою.

 

І так зробішся, як кажны,—

Будзеш спаці ў ковах,

Будзеш дужы і адважны,

Дый толькі на словах!»

 

[1905-1907]


[1905-1907]

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com