epub
 
падключыць
слоўнікі

Янка Купала

Сэрца спытай...

Прыгледзься днём яснаму сонцу

І месяцу ночнай парой;

Ў шум цёмнай услухайся пушчы

І ў шумы паводкі вясной;

 

Кінь вокам на мур пабяляны,

На стрэхі з саломы зірні;

Зайдзі на магілкі з крыжамі

І насып забыты крані;

 

Пакратай мінуўшчыны попел,

Што ў казках не кінула жыць;

Сягонняшні дзень паймі добра,

Што ўслед нашай долі бяжыць...

 

І ўсюды — ад краю да краю,

Дзе звернецца думка твая,—

Аб роднай старонцы пытайся

Ты неба, зямлі і жыцця.

 

А сэрца — калі не звёў сэрца —

Адкажа за ўсіх неўнарай:

У нас ёсць паны і іх слугі,

А людзі... што ж?.. Сэрца спытай...

 

1910


1910

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан