Газеце «Беларуская вёска»
Сей, вольны сейбіт,
Сей свой палетак!
А гэтак шчыра,
А дбала гэтак!
Сонца ўлье сілу
Вольным загонам,—
Зерне абойдзе
Шоўкам зялёным.
Вольна, як вецер,
На ўсю старонку
З коласам колас
Пачне гамонку.
Вольныя жнеі
Прыйдуць з сярпамі,
Густа засцелюць
Поле снапамі.
Людзі з няволі
Здзівяцца дзіўне
З вольнае працы
Ў вольнай краіне.
Здзівяцца людзі
І скажуць гэтак:
«Сей, вольны сейбіт,
Сей свой палетак!»
1926