epub
 
Падключыць
слоўнікі

Янка Купала

Спусташэнне

Га, чаго, вятрыска,

Так узбунтаваўся

І над вёскай блізкай

Ты не злітаваўся?

 

Ці цябе ўгнявілі

Людзі або неба?

Ці тваёй злой сіле

Выкупу патрэба?

 

Пазрываў салому

І шчыты з хацінак;

Зрабіў кучы лому

З хлеўчукоў, з адрынак.

 

Што цяпер пачаці?

Бедны люд вясковы!

Холад будзе ў хаце

Панаваць зімовы.

 

Будуць над калыскай

Плакаць бацька, маці

Дый цябе, вятрыска,

Праклінаць, пытаці:

 

Чаго, пеклаў цёзка,

Так узбунтаваўся

Дый над блізкай вёскай

Ты не злітаваўся?

 

[1905-1907]


[1905-1907]

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com