epub
 
падключыць
слоўнікі

Янка Купала

Станогае ліха

Станогае Ліха-Нядоля

Валочыцца з поля на поле;

А вочы ў яго — што ў начніцы,

А рукі ў яго — чараўніцы.

 

Дзе ступіць — там кроў выступае,

Дзе гляне — там крыўда сляпая

Народы хіне, як калоссе,

Каго ж абымае — смерць косе.

 

Трымае свет цэлы ў парадку,

Не мае канца і пачатку,

Не знае граніцы і меры,

Не гіне ад кос і сякераў.

 

Так блукае з поля на поле

Станогае Ліха-Нядоля;

Над ім жа сам Бог з перунамі

Дзяржыць страж, спавіты імгламі.

 

1913


1913

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан