epub
 
Падключыць
слоўнікі

Янка Купала

Ты прыйдзі...

Ты прыйдзі ка мне вясною,

Кветкаю прыйдзі;

Зацвіці красой са мною,

Думку разбудзі...

 

Ты прыйдзі ка мне улетку,

Коласам прыйдзі;

Песняй жніўнай на палетку

Думку саладзі...

 

Ты прыйдзі ка мне зімою,

Сонейкам прыйдзі,

Даўнай казкай залатою

Думку абудзі...

 

Ты прыйдзі ка мне увосень,

Зоркаю прыйдзі;

Ў свет далёкі з шумам сосен

Думку павядзі...

 

Ты прыйдзі і на магілкі,

Кветкаю прыйдзі;

Белай ручкай клён няхілкі

Шчыра пасадзі...

.............................

Ты прыйдзі...

 

1911




Беларуская Палічка: http://knihi.com