Ты з Заходняй, я з Усходняй
Нашай Беларусі,
Больш з табою ўжо ніколі
Я не разлучуся.
Твае коні, мае коні,
Пасля дзён трывожных,
Будуць пасвіціся разам
На лугу мурожным.
Разам будзем араць поле
Трактарам сталёвым,
Сеяць жыта і пшаніцу
На загонах новых.
Частавацца будзем разам,
З кожным новым годам,
Верашчакаю калгаснай
І калгасным мёдам.
Складаць будзем думкі-песні
Не на панскай службе,—
Песні будуць аб свабодзе,
Аб сталінскай дружбе.
1939