epub
 
Падключыць
слоўнікі

Янка Купала

У хорамах

Узносілі муры,

Каб княжыці ў мурах;

Ад зоркі да зары

Купаліся ў іграх.

 

Звінела серабро,

І золата, і медзь;

На зло і на дабро,

На ўсё — ўсё ўмелі мець.

 

Не ў страх ім ноч і гром,

Зямля, свет цэлы — рай;

Кані-арлы віхром

Імчалі з краю ў край.

 

Салодкі мёд пілі,

Жыць соладка было,

Забылі адылі,

Што йнакш жыло сяло.

 

1918




Беларуская Палічка: http://knihi.com