epub
 
Падключыць
слоўнікі

Янка Купала

У ночным царстве

Скрыпяць трухляцінай асіны,

Над курганамі звяр’ё вые...

Гасцінцам, церневай пуцінай,

У ёрмах, скованы, скацінай

Ідуць нябожчыкі жывыя.

 

Ідуць, ідуць... Сярод пустыні

Хрусцяць надломаныя косці,

І качанеюць ногі ў ціне,

І чахнуць вочы ў павуціне,

А шлях — як точаныя восці.

 

Перад вачамі глуш нямая,

І плач, і скрогат за вачамі;

Пракляцце ў жылах кроў сцінае,

Душу бяссілле вынімае,

Гняце змяінымі кляшчамі.

 

У грудзі, здаўленыя здрадай,

Упіўшыся рабская трывога

Шыпіць хаўтурнаю загладай;

На небе толькі як прынада,

Бялее млечная дарога.

 

То там, то сям запаланее

Іскра над скованаю шыяй;

Наскоча пошасць трупавея,—

І царства ночнае шалее,

Над курганамі звяр’ё вые.

 

[1906-1912]




Беларуская Палічка: http://knihi.com