epub
 
Падключыць
слоўнікі

Янка Купала

У вырай!

Гэй, вольныя птахі, саколія дзеці!

У вырай! Да сонца вясёлкавым шляхам!

Час сонца схапіці і сонцам ірдзеці

І зведываць светы арліным узмахам.

 

Гэй, вольныя птахі, патомкі крывічаў!

Да неба! Па зоры і гром перуновы...

Час крылле расправіць — пагудка ўжо кліча,

Ўжо віхры цярэбяць да шчасця шлях новы!

 

Гэй, вольныя птахі, ўладарнікі песні!

На шляхі, пад сцягі красы і свабоды!..

Час вылецець к славе з пагібельнай плесні

І песняй агністай дзівіці народы.

 

1920


1920

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан

Беларуская Палічка: http://knihi.com