epub
 
Падключыць
слоўнікі

Янка Купала

Ўспомні!..

Ул. Станкевічанцы

 

Ўспомні, як згубіш крыллі арліны,

Што моц у высях даюць лунаць,

І сіл не хопіць табе, дзяўчына,

Свет і самую сябе змагаць!

 

Ўспомні, як сетку з пут павуціных

Мачыха-доля спляце у жыцці,—

Як на расстайных станеш пуцінах

не згадаеш, кудой пайсці!

 

Ўспомні, як згубіш ворага й друга,—

Жыць пачнеш ценем з-пад курганоў

Без веры ў шчасце, без верных слугаў —

Думак дзявочых, дзіцячых сноў!

 

Ўспомні, як ночка ляжа навокал,

Вецер засвішча ў хаўтурны тон,

А сэрца дрогне, бы ў клетцы сокал,

І ў душы ўскрэсне здань быўшых дзён!

 

Ўспомні, не ў хвілю радасці дзіўнай,—

З іншым раздзеліш радасць сваю,—

І не мяне ты ўспомні, дзяўчына,—

Ўспомні, от... гэту думку маю!

1914


1914

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан

Беларуская Палічка: http://knihi.com