epub
 
падключыць
слоўнікі

Янка Купала

Вялікаму Кастрычніку

Была Расія царскіх дзён,

А дні былі, як ночы;

Душыў бязлітасны прыгон

Сялянаў і рабочых.

 

Разбэшчана паны, купцы

Працоўным людам гандлявалі,

Раслі магільныя капцы,

Папы малебны завывалі.

 

Над краем шыбеніц, астрогаў

Трыумфаваў каронны кат...

Было яно — ўладарства злога

Пятнаццаць год таму назад.

 

Паўстаў пракляццем катаваны,

Паўстаў, хто з голаду век пух,

Апалі рабскія кайданы,

Апаў нявольніцтва ланцуг.

 

Паўстаў магутны пралетарый,

Чырвоны ўзняўшы сцяг ўрачыста,

І рушыў ў бітву грознай хмарай

Супроць сатрапаў і царыстаў.

 

Паўстаў ніштожыць цьму і здзекі.

Ніштожыць царскае ўладанне,

Знішчаць адвечны гнёт навекі

Для свайго светлага йснавання.

 

І зарунеў на ўсе староны

Саюз Рэспублікаў Савецкіх,

Прамогшы ворагаў пагромных —

І нутраных, і інтэрвенцкіх.

 

Красуй жа ў радасці няспынна,

Краіна вольная Саветаў,

Ядыная пакуль айчына

Усіх працоўных ўсяго свету.

 

Пралетар’ят усіх краінаў

Пад сцягам Леніна удумна

Шляхі, я веру, працярэбе

І да сусветнае Камуны.

 

1932


1932

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан