epub
 
Падключыць
слоўнікі

Янка Купала

Віхор загуляў

Гэй, шумна у боры

Віхор загуляў;

Аб слёзах, аб горы

Завыў, запяяў.

 

Аж хіляцца сосны,

Аж стогнуць дубы

Ад гэтай жалоснай

Віхорнай кляцьбы.

 

Вавёркі-грызухі

Заселі ў дуплох,

Мядзведзь ад разрухі

Палез у бярлог.

 

А людзі, што бор той

На дровы сяклі,

З душою раздзёртай

У хаты ўцяклі.

 

І пуста, і дзіка

Пад борам кругом,

Як помсты вялікай

Заплёў хто залом.

 

Як дзе па пажары —

Жыцця ані чуць...

Касматыя хмары

Па небе паўзуць.

 

Віхор жа у боры

Гудзе і гудзе

Аб слёзах, аб горы,

Аб людскай бядзе.

 

1906


1906

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com