epub
 
Падключыць
слоўнікі

Янка Купала

Вецер

Ах, і з якой жа дакукай

Бушуе са свістам крылаты!

Вые жалобна, як сука

Па ўтопленых дзецях-шчанятах.

 

З гікам праз нетры, ламочча

Імчыцца і ліжа вужакай,

Ліжацца ў вушы, у вочы,

Як тая слізлівая п'яўка.

 

Скуль яго з немачай гэтай

Нялёгкая гоніць, прыгнала,

Як бы яму людзей, свету

Без свету майго яшчэ мала?

 

Я ж не прасіў і не клікаў,—

Не трэба такога мне госця,—

Без тваёй музыкі дзікай

Патраплю злажыць свае косці.

 

1926


1926

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан

Беларуская Палічка: http://knihi.com