epub
 
падключыць
слоўнікі

Янка Купала

З думак маркотных

Трудненька, ой, жыці

Ў беднасці, ў глушы:

Замест смеху — слёзы,

Жаль нейкі ў душы!

 

Шчасце не прыходзе,

Хоць дней клічу шмат;

Гора не ўцякае,

Хоць і выгнаць рад.

 

Песню б вырваць з сэрца

І пусціць на свет!..

Хай ляціць, хай знойдзе

Ласку і прывет.

 

Мо шчаснейшай будзе,

Як я, сын бяды,

Можа, хто пачуе,

Запяе з нуды.

 

Можа, хоць бор цёмны

Рэхам адгукне,

Можа, вецер вольны

Заўтуруе мне.

 

Можа, ў небе зорка

Песенькі маей

Зразумее голас

І міргне ясней.

 

Ночка ў тайных шэптах

Азвецца хвальбой,

А можа, і людзі

Не пагардзяць ёй.

 

[1906-1910]


[1906-1910]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан