epub
 
падключыць
слоўнікі

Янка Купала

З гора ды з бяды

Гэй, хадзі ў карчомку,

Дружа малады!

Гарэлачкі вып’ем

З гора ды з бяды!

 

Утопім долю ў чарцы

Хоць на час сваю,

Там табе я песню

Гулка прапяю.

 

Чарачка-галубка

Шчасця дадае

I сэрца, і думкі

Весяліць твае.

 

Пры чарачцы поўнай

Радасна ў вачах,—

І добрымі людзі,

І жыцця не страх.

 

І сябе пры чарцы

Ў крыўду б не даваў,

І за сваю б праўду

З кожным ваяваў.

 

І кроў маладая

Ў жылах закіпіць,

І дзяўчынку-сонца

Хацеў бы туліць.

 

Дык чаго марудзіш,

Дружа малады?

Хоць раз хадзі ўп’ёмся

З гора ды з бяды!

 

[1906-1910]


[1906-1910]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан