epub
 
Падключыць
слоўнікі

Янка Купала

З летніх малюнкаў

Коціцца, ўецца далінкай крыніца,

Б’ецца, плюскоча ў каменнях вадзіца,

Далей плыве і плюскоча.

Белымі грудкамі лёгшы на траўцы,

Хоча дзяўчынка к вадзіцы дастацца,

Губкамі чэрпнуці хоча.

 

Вольха лісткамі ёй шыю ласкоча,

Плюскатам рэчка смяецца у вочы,

Сонейка ўсіх абнімае.

Сонейка, рэчка, вольха, дзяўчына

Думцы ўсміхаюцца соладка, дзіўна,

Думка іх шчыра вітае...

1911




Беларуская Палічка: http://knihi.com