epub
 
Падключыць
слоўнікі

Янка Купала

З недацветаў

Зелянелі лагі,

Зацвіталі сады,—

З маладою сваёй

Я спаткаўся тады.

 

Вецер косы яе

Расплятаў, спавіваў,

Прыпадаў да грудзей,

Калыхаў, напяваў...

 

Абняліся мы з ёй,

Божым сном паплылі

Ўдаль да сонца ўдваіх

Па зялёнай зямлі,

 

Па квяцістым пуці,

Паласой залатой,

Ўдаль да сонца ўдваіх

Заадно з яснатой...

 

Пад агністай зарой,

Над сівым курганом

Заручаліся з ёй

Туманом і агнём...

 

Аж нязменная ноч

Наплыла, апляла,

Непраходнай сцяной

Паміж намі лягла:

 

Маладую маю

Разлучылі са мной...

...................................

Так расстаўся навек

Я з сваёю вясной.

 

1911


1911

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан

Беларуская Палічка: http://knihi.com