epub
 
Падключыць
слоўнікі

Янка Купала

З нуды

Нудна... Штосьці ломіць косці,

Ныюць жалем грудзі,

На надвор’е выйду, гляну,

Мо уцешней будзе.

 

Ўзяў апратку, кінуў хатку,

На сяло выходжу,

Там-сям лажу, свата, сваццю,

То куму знаходжу.

 

Пад аконца, дзе больш сонца,

Дзевачкі сышліся —

Дружка ў дружку, як сасонкі,

Пазірай — дзівіся!

 

Бровы, вочкі, губкі, шчочкі

Аж завуць к пакусе,

Грудзі пульхны, як пампушкі,

Не адходзь — любуйся!

 

Ой, дзяўчаткі! хоць вы гладкі,

Быццам маляваны,—

Не хацеў бы я папасці

Ў вашыя кайданы.

 

З вамі жарты — не з паўквартай,

Згінуў — толькі глянуў,

Будзь пры памяці, цвярозы,—

З вамі будзеш п’яны.

 

З сэрца ранак і жаданак

Не збыць і сякерай;

Ці быў з вамі, а ўжо гінеш,—

Любіш вас без меры.

 

І ахвоты да работы

Не прыдбаці з вамі...

Ох, сваю вяліку сілу

Знаеце вы самі!

1907


1907

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com