epub
 
падключыць
слоўнікі

Янка Купала

З вясной

Як сышла святая

Вясёласць вясны,—

Цэлы свет скідае

Зімавыя сны.

 

Сэрца шчасцем б’ецца,

Кроў кіпіць агнём,

Песня раздаецца:

Болей не заснём!

 

Песня ўвысь імчыцца,

Як званоў біццё;

Кожны весяліцца,

Блаславіць жыццё.

 

Гаманяць народы,

Як тэй пушчы шум.

Колькі тэй свабоды!

Колькі светлых дум!

 

Згінуў сон нягодны,

Дзе ні паглядзіш...

Чаму ж ты, край родны,

Як забіты спіш?

 

1913


1913

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан