epub
 
Падключыць
слоўнікі

Янка Купала

Захад сонца

За нязнаную

Даль пахмурную

Закацілася

Ясна сонейка.

 

Ой, пара, пара

Табе, добрае,

Адпачыць пайсці

После дня ўсяго.

 

Нахадзілася,

Нагулялася

Над зямелькаю

Па-над крыўднаю.

 

Бачыць трэ было,

Каб уродаю

Ніва ўбогая

Убіралася.

 

Сагрэць трэ было

Беспрытоннага,

Слёзы высушыць

Абнядоленым.

 

Усміхаціся

Ўсім замучаным

Доляй-радасцяй,

Воляй-сокалам.

 

После гэтакай

Працы-мачыхі

Спачынь, сонейка,

Там за горамі.

 

І назаўтра ўстань

З новай сілаю,

Узнімі агні,

У сэрцы стухшыя.

 

Распалі агні

Веры ў будучнасць,

Што дзён лепшых мы

Дачакаемся.

 

[1905-1907]


[1905-1907]

Тэкст падаецца паводле выдання: Купала Я. Поўны збор твораў. У 9 т. - Т. 1. Вершы, пераклады 1904-1907. Мн., Маст. літ., 1995. -462 c. [4] л. іл.
Крыніца: скан

Беларуская Палічка: http://knihi.com