epub
 
Падключыць
слоўнікі

Янка Сіпакоў

"А збудзённіць паланенне..."

А збудзённіць паланенне,

Стоміць твой утульны рай,—

У другое вымярэнне,

Бы да бою, паспяшай,

 

Звыклы дзень — нібыта клетка,

Сцеражэ душу тваю:

Там і ўзімку, і улетку

Сам з сабой, з нудой ваюй.

 

Бы аплецен павуцінай

Твой пакой і твой спакой.

Выбірайся, нібы з ціны,

З насалоднасці такой.

 

І спяшайся на завею,

І пазнай мяцеліц смак

Там, дзе ўсё нязвыкла неяк,

І усё — не так, не так...

 

Давярацца сцежкам можна.

Ну і што, калі зіма!

Бач, і вецер спадарожны,—

Толькі ветразя няма.

 

Не бяда! Мы — ветры ў жмені

Пазбярэм, як лейцы, ўсе.

І ў другое вымярэнне

Нас завея панясе...




Беларуская Палічка: https://knihi.com