epub
 
Падключыць
слоўнікі

Янка Сіпакоў

"Ах, мілы конь, ах, мілы косю..."

Ах, мілы конь, ах, мілы косю,

Прабач за даўні здзек. Даруй,

Што запрагаў цябе ў калёсы,

Што й сёння на табе ару.

 

Так, то ж абраза і пакуты:

Цябе, што вольніцай гуляў,

Спачатку я, схітрыўшы, спутаў,

Пасля — ў рот цуглі — зацугляў.

 

Кажу сягоння я такое,

Бо ты — нібы ўжо госць у нас:

Перад табою, за табою

Барозніць трактар твой папас.

 

Што ж, зноў вяртайся ў стан свой дзікі,

Туды, дзе воля, снег, імжа...

Не струнь вачэй на нашы крыкі,

На наша «косю» не зважай.

 

Калі ж, завеяны па вушы,

Ты цёпла ўспомніш пра аброць,

Тады з ласямі да кармушак

Па дружбе даўняй падыходзь.

 

Ды хоць спіну не муліць збруя,

Трава — што зблудзяцца чмялі,—

Па мне ўсё роўна засумуеш,

Бо мы ж з табою век зжылі.

 

І я, спыніўшы трактар раннем,

Цябе пабачыць захачу,

Тваё шчымлівае іржанне

У цішыні палёў пачуць.

 

І па начлегах, без прынукі,

Цябе пайду я сам шукаць,

Каб гарадскім сваім унукам

Тваё іржанне паказаць.




Беларуская Палічка: https://knihi.com