epub
 
Падключыць
слоўнікі

Янка Сіпакоў

"Калі мая закончыцца сцяжына..."

Калі мая закончыцца сцяжына,

Я не пакіну родную зямлю,

Якую гэтак роспачна люблю,

Цябе таксама, боль мой, не пакіну.

 

Каля цябе, каханая жанчына,

Я волю дам зялёнаму галлю

І сокам лісце ссохлае налью —

Няхай яно шапоча над Айчынай.

 

Лістамі дрэў пачну нанова марыць,

Кветкаю з травы, нібы радарам,

Услухаюся ў блізкі ўжо сусвет.

 

І збоку будзе бачыць мне нязвычна,

Як паміж сузор’яў і планет

Ляціць Зямля — наш карабель касмічны.




Беларуская Палічка: https://knihi.com